Австралија и Холандија започнаа правна постапка против Русија во Меѓународната организација за цивилно воздухопловство на ОН поради соборувањето на летот МН-17 на Малезија ерлајнс во 2014 година, јави Си-Ен-ЕН.
Летот на Малезија ерлајнс на релацијата Амстердам-Куала Лумпур беше соборен во јули 2014 година со проектил истрелан од проруските бунтовници во Украина. Сите 298 луѓе во авионот загинаа.
„Одбивањето на Руската Федерација да ја преземе одговорноста за нејзината улога во соборувањето на летот MH-17 е неприфатливо и австралиската влада отсекогаш велеше дека нема да исклучува никакви правни опции во нашата потрага по правдата“, се вели во заедничкото соопштение на премиерот Скот Морисон, министерката за надворешни работи Марис Пејн и јавната обвинителка Михаилија Кеш.
„Во октомври 2020 година, Русија еднострано се повлече од преговорите со Австралија и Холандија во врска со соборувањето на летот MH-17 и одби да се врати на преговарачка маса и покрај постојаните барања на Австралија и Холандија.
Двете земји тврдат дека Русија ги снабдувала сепаратистите со ракетниот систем користен во нападот, а по инцидентот го повлекла. Тие велат дека „ракетата можела да биде истрелана само од обучениот руски екипаж на Бук-ТЕЛАР, или барем од некој што дејствувал под нивна инструкција, насока или контрола“.