Се сеќавате сигурно на грчкиот пензионер чии што слики пред неколку дека го обиколија интернетот? Човекот седеше пред една банка а неговите солзи го разнежија светот.
Еден австралиски богаташ од светот на финансиите ја виде сликата и на неа го препозна човекот кој е пријател на неговото семејство.
Сликата на Јоргос Хатцифотиадис, кој има 77 години, служеше за илустрација на грчката трагедија во многу од светските медиуми. Пензионерот од Солун не можел да извади пари од пензијата на неговата сопруга и во очај седнал пред банката и почнал да плаче.
Бизнисменот Џејмс Куфос од Австралија ја видел сликата на солунскиот пензионер кој многу му заличел на еден пријател на неговиот починат татко. Мајката на Куфос, која живее во Солун, потврдила дека се работи за нивен добар пријател.
Куфос одлучил да помогне и преку Фејсбук повикал на солидарност. Куфос во сабота патува за Солун за да ги најде пријателот на татко му и да се обиде да помогне.
“Ќе го изненадиме и ќе му подариме убава сума пари. Но ние исто така покренавме кампања која треба да донесе фондови и за други Грци кои се во големи финансиски тешкотии”, изјавил Куфос за австралиските медиуми.
Инаку во Австралија живее голема грчка заедница. Мелбурн е трет град во светот со луѓе кои зборуваат грчки по Атина и Солун, тврдат австралиските статистики.