Додека стасуваа информациите за најмалку пет мртви лица од кои три деца во водите помеѓу Грција и Турција, биланс кој најверојатно ќе расте во наредните часови поради тоа што десетици лица паднале во вода, Австрија најави дека ќе направи ограда на својата граница со Словенија. Ова е за прв пат една земја од Шенген зоната да најави дека прави ограда на границата на друга земја која исто така е дел од Шенген.
Виена вели дека тоа го прави за да може да го контролира бранот мигранти.
Словенечкиот премиер Миро Церар потсети дека неговата земја “веќе се подготвила за вакво сценарио” и дека владата е подготвена за крене оргада на границата со Хрватска ако се оцени дека тоа е неопходно. Љубљана додаде дека станува збор за ниска ограда за да се спречи влегувањето на мигрантите преку полињата.
Австриската министерка за внатрешни работи Јохана Микл-Лајтнер изјави дека целта не е да се сопрат мигрантите:
“Станува збор за да се озбеди ред во влегувањето и земјата да може тоа да го контролира а не за затворање на границата”, прецизираше министерката.
Австриската полиција тврди дека работи најдобро што може и смета дека Баварска прави преголема селекција на луѓето кои сакаат да одат во Германија.
И покрај овие зборови, реакција дојде од Берлин кој смета дека Австрија испраќа илјадници бегалци во Баварска без да ја информира Германија. Министерот за внатрешни работи Томас де Мазиер изјави дека ова однесува на Виена “не е коректно” и побара да биде сменета оваа најава. За Берлин оградите и ѕидовите не се решение.
Берлин тврди дека вратата на земјата ќе остане отворена, но новите мерки ќе доведат до враќање на економските мигранти и пред се десетици илјади кои доаѓаат од Балканот.

Истовремено во повеќе градови во Чешка денес имаше протести против доаѓањето на бегалците. Протести се одржаа во Прага, Брно, Либерец, Усти-над-Лабем и Острава а според полицијата имало 3 до 5 илјади луѓе.
Чешките власти добија деновиве сериозни критики од повеќе меѓународни институции и од Обединетите Нации поради деградирачкиот третман во центрите за бегалците во оваа земја. Критики на чешка адреса се испраќаат од повеќе институции и хуманитарни организации поради овој третман и исламофобските изјави на дел од чешкото раководство помеѓу кои и оние на претседателот на државата Милош Земан.




