Претседателот на Сојузот на Ромите, Амди Бајрам ги повика ромските гласачи да излезат и да гласаат „ЗА“ референдумот, како што рече „што порано и што помасовно за референдумот да биде успешен”.
-Ромите во Македонија и за време на првиот референдум за самостојност на државата и гласаа во најголем дел. Во Македонија, Ромите ги имаат сите права, тие се во преамбулата и во Уставот и се лојални на државата. Кога треба да се донесе некој закон ние сме тука. Лојални политичари сме, секогаш застануваме од страната на државата. Секогаш даваме се што можеме, рече Бајрам на денешната прес конференција, на која кажа дека ова е одлука на Претседателството на партијата.
-Ќе гласаме “ЗА”. Тоа “ЗА” е за граѓаните, за македонските граѓани. Во тоа гледам ангажираност, едногласна одлука за работа. Сите Роми работиме заедно, бидејќи се работи за сите нас, за НАТО и за стабилна држава, за да влеземе во ЕУ. Да излеземе што порано и помасовно тој ден за референдумот да биде успешен, рече Амди Бајрам.
Според него, иако има партии што нема да го поддржат референдумот, народот и членовите на тие партии скришум ќе гласаат.
-Не би ги коментирал ВМРО-ДПМНЕ, ама мислам дека при крај ќе надвладее разумот кај нив. Се работи за Република Македонија. Ние немаме друга држава. Цело време се работи за интеграцијата во НАТО и ЕУ. Знаете, магарето застанало на улица и не сака да шета, па мора малку да го боцкаш. Не е во ред да го бојкотираат референдумот, нека дадат повик да се гласа “за” или “против”, рече Бајрам.