Ристе Ставревски, кандидат за началник на СВР Скопје, преку својот адвокат Панче Тошковски испрати барање за јавно извинување, демант и јавно повлекување на вест за текстот со наслов „Чулев го дава СВР Скопје на началник вмешан во изборни измами“. Барањето за демант го објавуваме во целост:
„На ден 10 јануари, 2020 година, на Вашата интернет страница имате објавено вест со наслов „Чулев го дава СВР Скопје на началник вмешан во изборни измами“, вест која содржи
клеветнички и навредливи изјави за нашиот клиент.
Воедно, освен сензационалниот наслов, во веста имате наведено дека Ристе Ставревски, е лице кое е едно од 20-тината обвинети во случајот „Титаник“, што е целосна неточна информација и претставува клеветничка изјава која го нарушува угледот и честа на клиентот.
Понатаму, во текстот е наведено дека лицето Ристе Ставревски преземал активности надвор од советничките овластувања во МВР за партиски цели, што истакнуваме дека е повторно
клевета, од причина што против Г-дин Ставревски ниту е покрената дисциплинска постапка во рамки на МВР за преземање на активности кои не се од делокругот на неговата работа ниту се јавува во својство на осомничен односно обвинет во било која постапка.
Груба клевета преставува и делот во кој се наведува дека „Тандемот советници Ставревски-Тодоровски бил посветен во фалсификувањето на изборните процеси со цел ВМРО-ДПМНЕ да остане на власт судејќи според пораките, но и аудио снимките“.
Освен клевети, веста содржи и навреда со изјавата „Едноставно, Ставревски се поставува на позицијата началник на СВР Скопје затоа што покажал извонредна лојалност и придонел во заштита и одржување на режимот на ВМРО-ДПМНЕ“, што е рушење на угледот и честа на професионалец со долгогодишно искуство во МВР, против кој не е водена ниту една постапка во МВР и Јавното обвинителство, ниту пак му е пропишана казна или санкција.
Напротив, Ставревски е лице со долгогодишна кариера, искуство и поседува бројни сертификати кои говорат за неговата професионалност.
Оттука, а согласно одредбите од Законот за граѓанска одговорност за навреда и клевета, член 13 и 14, бараме од Вас во целост да ја објавите нашата реакција, да ја повлечете веста со која го нарушивте угледот и честа на нашиот клиент и јавно да се изјавите за невистините и лагите кои ги ширите и со кои ја манупулирате јавноста во име на владеачката политичка
партија“, стои во демантот.