Амбасадорот на САД во Македонија, Џес Бејли, ја искритикува работата на Советот за јавни обвинители, откако беше објавено дека претседателот на Советот Коле Штериев учествувал во носење одлука кога се одлучувало неговата вунка да биде избрана за обвинител во Обвинителството за организиран криминал и корупција. Како што рече Бејли, во Советот за јавни обвинители има конфликт на интереси и дека доколку некои медиуми не биле охрабрени да пишуваат за ова, јавноста немаше да дознае.
-Јавноста и професионалците изгубија уште неколку грама доверба во системот. Неколкумина новинари ја обработија оваа приказна, доаѓаме до моментот дека храбрите медиуми и граѓанското општешство имаат важна улога во владеење на правото, рече Бејли говорејќи за правосудството, на конференцијата на парламентарните комисии за европски прашања на државите опфатени во процесот за стабилизација и асоцијација на ЈИЕ-КОСАП, што денеска се оддржува во Скопје.
Изјавата на Бејли се однесува и на приказната што ја објави „Макфакс“ дека обвинителката Фиданка Рајевска гласала кога како точка на дневен ред бил изборот на нејзината колешка, Лидија Раичевиќ, која пак, кривично го гони нејзиниот сопруг за перење пари.
– Ми се чини дека тука станува збор за една ситуација на конфликт на интереси. Никој точно не знае што точно се случи во таа ситуација, рече Бејли.
Во врска со реформите, Бејли рече дека САД и Европа и помогнаа на Македонија да излезе од она што се нарекуваше длабока политичка криза и смета дека за Македонија докрај да ги истурка реформите потребно е поддршката од 75 отсто за влез во ЕУ и НАТО да се преточи во политичка волја. Владеењето на правото, вели амбасадор Бејли, е еден од најголемите предизици со кои се соочува земјата, а многу често земјите стануваат ранливи на корупција и криминал поради недостаток на владеење на правото.
– Граѓаните треба да бараат отчетност, транспаретност и информирање од страна на институциите. Тоа значи дека граѓаните треба да одбијат да го свртат погледот на другата страна кога ќе се соочат со прекршување на законите или со корупција, а тоа значи дека не треба да се прифаќаат работите онакви какви што се особено доколку сте соочени со непотизам и лични појави, рече Бејли.