Не може без процедури да делиме ваучери ! Јавниот повик ќе се спроведе до крај, а ако треба и плус повици ќе распишеме, а во постојниот повик нема да има никакви измени, изјави на денешната прес-конференција министерот за економија, Крешник Бектеши, одговарајќи на новинарско прашање во врска со реакциите на граѓаните за ваучерите за одмор во висина од 200 евра за коишто Владата најави дека ќе ги доделува на граѓаните со ниски приходи.
Дел од граѓаните реагираат дека ваучерите нема да може да ги добијат ниту лицата чие семејство е со две минимални плати, бидејќи месечниот износ надминува 30.000 денари, како и тоа дека процедурите се преоптоварени со администрација – извод од матичната книга на родени и други документи, дека рокот за доставување на барањата за ваучерите е краток – трае до 30 јуни и други забелешки.