Претседателот Бајден ја именуваше Карин Жан-Пјер за нов главен портпарол – прва афроамериканка и декларирана геј личност што ќе ја има таа улога. 44-годишната Жан-Пјер претходно беше главен заменик – секретар за печат на администрацијата на Бајден.
Таа ќе ја замени прес секретарката во заминување Џен Псаки (43) која заминува кратко време по именувањето и му се враќа на новинарството – во левичарскиот броадкастер MSNBC. Псаки на Твитер ја нарече својата наследничка „извонредна жена“ со „морално јадро“.
Секретарите за печат одржуваат дневни брифинзи со новинарите од Белата куќа, што значи дека улогата им е од висок профил. Секретарот за печат на Белата куќа е ликот на претседателската администрација пред националните медиуми но и во земјата и светот.
Администрацијата на Бајден ја најави Карин Жан Пјер како револуционерен чекор со кој става акцент на ставање на црните жени за кои се смета дека се политички невидлив дел од коалицијата на Демократската партија иако имаат суштинска улога во привлекување на гласачите.
Жан-Пјер претходно била аналитичарка во MSNBC. Родена на францускиот карипски остров Мартиник и израсната во Квинс, Њујорк, таа беше клучен политички директор во администрацијата на Обама. За време на претседателските избори во 2016 година, таа беше национален портпарол на MoveOn, голема либерална група за застапување.
Пред да се приклучи на новинарскиот тим на Белата куќа, таа беше шеф на кабинетот на Камала Харис, откако беше избрана за потпретседателски кандидат на Бајден.
Назначувањето на Жан-Пјер доаѓа пред клучните избори во ноември, кои ќе одредат каков ќе биде остатокот од мандатот на Бајден.