Амазонската прашума позната и како „бели дробови на светот“ во моментот емитува повеќе јаглерод диоксид отколку што е во состојба да апсорбира, објавија за првпат научниците. Според најновата студија, емисиите на јаглерод диоксид изнесуваат една милијарда тони годишно. Повеќето од овие емисии се предизвикани од пожари што воглавно биле предизвикани од луѓе кои расчистуваа дрвја за правење на пасишта. Но, истражувањето сега, исто така, покажува дека дури и без директна човечка интервенција, поради екстремно високите температури и честите суши, емисиите на јаглерод ќе продолжат да растат.
Ова откритие е особено загрижувачко затоа што досега се сметаше дека амазонската прашума е одговорна за пола од вкупната апсорпција на јаглерод на Земјата и дека ја забавува стапката на глобално затоплување. Научниците, сепак, предупредуваат дека Амазон полека се претвора во извор на СО2, пренесува „Јутарњи лист“.
За ова истражување биле користени мали авиони кои ја измерија количината на СО2 до 4.500 метри над шумата во текот на последната деценија. Претходните студии кои укажуваа на тоа дека амазонската прашума станува извор на СО2 се засноваа на сателитски снимки, но така собраните податоци беа дефицитарни, пред сè, поради нарушувања предизвикани од облаци и голема вегетација на дождовни шуми.