Берни Еклстон (86) потврди дека повеќе не е извршен директор во Формула 1. Со тоа се става крај на неговото водење на најпопуларниот автомобилистички спорт во изминатите четири децении.
„Денеска бев сменет од функцијата. Тоа е. Сега и официјално си заминувам. Повеќе нема да бидам лидер на таа компанија“, изјави Еклстон за германското издание „Auto motor und sport“.
Смената на кормилото во Формула 1 ја пренесуваат и француските медиуми според кои Еклстон е тргнат од позицијата од новите сопственци на „Ливерти Медиа“. На негово место е назначен Американецот Чејс Кери.
Британскиот милијардер ја направи Формула 1 најспектакуларно тркачко шоу на планетата чиј годишен приход достигнува две милијарди долари. Неговото заминување, сепак, не претставува изненадување бидејќи се заговара и се шпекулира со месеци.
Еклстон, по смената, е именуван за почесен претседател на Формула 1.
„Тоа е мојата нова позиција. Сега ја носам таа титула иако не знам што точно значи. Одвреме-навреме ќе посетам некоја трка. Имам, сепак, многу пријатели во Формула 1 и, секако, доволно пари да се дозволам да отидам на било кое гранпри“, рече 86 годишниот Британец.
Компанијата „Либерти Медиа“ лани ја презема Формула 1 од компанијата „Cи-Ви-Си партнерс“ за шест милијарди фунти. Купопродажниот договор е во два дела. Првата транша се однесува на 18,7 отсто на уделот во натпреварувањето, а останатите 81,3 отсто новите сопственици ќе ги стекнат со одобрување на регулатори како и на Меѓународната автомобилистичка федерација (ФИА).