БЕСА ќе го поддржи новиот Закон за јавно обвинителство ако СЈО остане да функционира како независна институција, а не како што се предлага да биде составен дел од ЈО.
„БЕСА е подготвена да даде поддршка на СЈО за оваа институција да продолжи да работи со полн капацитет, да им се продолжи рокот за иницирање на постапки, а „бомбите“ и натаму да бидат користени како докази во постапките“, рече Фадил Зендели од БЕСА.
Од партијата коментираат дека доколку СЈО стане дел од Јавното обвинителство, ќе се претопи во Јавното обвинителство кое и досега беше нефункционално. Зендели додаде дека тие како партија ќе бараат гаранција од Владата дека се залагаат за неселективна правда.
„Во „бомбите“ слушнавме дека многу функционери на ДУИ се вплеткани во криминал, но за нив нема постапки“, рече Зендели.
Овие забелешки за Законот за јавно обвинителство, претставници на БЕСА ќе и ги соопштат и на министерката за правда Рената Дескоска. По неуспешниот обид за договор со ВМРО ДПМНЕ, Дескоска најави дека ќе разговара со сите пратенички групи во Собранието за да се обезбеди двотретинска поддршка за новиот закон за Јавно обвинителство.
По состанокот со претставнции на ВМРО ДПМНЕ, Дескоска изјави дека барањето на ВМРО-ДПМНЕ во новиот Закон за Јавно обвинителство да се вметне одредба согласно која би престанале сите постапки на СЈО отворени по 30 јуни 2017 значи амнестија и за такво нешто нема простор во законот.