„Да бев во позицијата да им кажам дека платите може да се зголемат за 30 отсто и повеќе, тоа ќе беше хит и за граѓаните и за стопанството“, рече министерот за финансии Фатмир Бесими, во вечерашната емисија „Вин-вин“ на телевизија Телма.
Тој вели дека сепак, за да растат платите во една економија, треба да има поголема продуктивност.
„Тие платите ги добиваат од даноците и од стопанството. Мора да расте продуктивноста на економијата за да има повеќе приходи и јавниот сектор да биде поефикасен во услугите и исто така да го следи раст на пари во приватниот сектор. Нема магија. За да има повисока плата мора да има поголема продуктивност во економијата. Кога зборувам за буџетски средства. Тука има економско-оцијален дијалог. Владата досега, барем оваа година покажа голема кооперативност. Тоа е отворена тема, затоа кажав дека јас не сум адресата. Министерството за финансии кажува само дали тие политики можат да се вклопат во еден одржлив буџет“, образложи Бесими.
Според Бесими, сѐ што се случува на европските пазари се пренесува кај нас, зашто имаме фиксен девизен курс во однос на еврото.
„Учеството на прехрамбените производи кај нас е повеќе од 50%. Тоа дополнително влијае врз инфлацијата. Па оттука во четири месечниот период, просекот на инфлација од 8,4%. со тоа што април надмина 10%, тука гледаме дека учеството на прехрамбените производи е над 18%, 29% се цените на нафтените деривати. Со мерките кои ги преземаме и кои ќе ги преземеме ние нема да ги решиме проблемите. Тоа што граѓаните треба да знаат е дека енергијата ќе треба да се штеди, бидејќи цените не се одржливи на ова ниво кое го имаме сега ние, во споредба со светските и европските пазари“, вели министерот Бесими.
Тој вели дека ова не се само зборови, бидејќи има фонд за енергетска ефикасност во Развојната банка и дека владата прави чекори за подобрување на енергетската ефикасност.