Во трупот на авионот во кој беа фудбалерот Емилијано Сала и пилотот Дејвид Иботсон е видливо тело, пренесува „Би-Би-Си“. Леталото од типот „пајпер“, што исчезна од радарите на 21 јануари, е лоцирано на дно на морето, а британскиот ТВ сервис известува дека од подводните снимки во него се забележува човечко тело.
Потрагата по „пајперот“ по морското дно и официјално е завршена во текот на денот. Приватната агенција (ААИБ) што беше ангажирана од семејството на аргентинскиот напаѓач ја извести јавноста дека нема да презема натамошни чекори.
„Врз основа на анализите на видео снимки од РОВ, подводно далечинско управување на возило, видливо е тело во средина на авионот. Се разгледуваат натамошни чекори со семејствата на патникот и на пилотот“, соопштија од британскиот огранок за истражување на несреќи.
Сала во зимскиот преоден рок направи трансфер од Нант во Кардиф за сума од 17 милиони евра. Но, летот од Франција кон Островот беше кобен за Аргентинецот над Ла Манш. Остатоците од авионот се лоцирани по две недели од несреќата, откако властите ги затворија спасувачки операции што траеја само три дена.