Повеќе од 100 битолчани вчера, уште на првиот ден, поднеле барања за проценка на штетите од земјотресите на шалтерите на општината.
Врз основа на доставените барања, комисијата од oпштина Битола ќе изврши проценка на штетите на терен, по што ќе постапи, а барањата можат да се доставуваат до среда, 26. јануари годинава.
Денеска во Битола претставници на Владата, предводени од вицепремиерот Љупчо Николовски, одржуваат работен состанок со градоначалникот на Општина Битола, Тони Коњановски, во врска со настанатите штети. Советот на Општина Битола веќе достави барање до Владата за помош по претрпените штети од земјотресот.
По средбата, за денеска во 13.00 часот е најавена и прес-конференција.
Општинските власти веќе побараа во обештетувањето на штетите на битолчани да се вклучи и Владата, од која побараа да одржи итна седница, на која би била разгледана состојбата во Битола по серијата земјотреси.
Барањата да се доставуваат до 26 јануари, од 07.30 до 15.30 часот
Како што вчера информираа од Општината, жителите на Битола при доставување на барањата за проценка на штети по серијата земјотреси на ден 09.01 и 10.01.2022 година, во прилог на истото потребно е да достават: имотен лист/доказ за сопственост, фотографии од оштетениот објект, копија од лична карта и број на трансакциска сметка. Врз основа на доставените барања, комисијата од Општина Битола, ќе изврши проценка на штетите на терен, по што ќе биде соодветно постапено.
Барањата можат да се доставуваат до среда 26.01.2022 од 07.30 до 15.30 часот.
(Љ.Б.)