Неколку бизнисмени и поранешни функционери на 10 октомври поднеле документи, а денеска им биле одобрено да основаат Здружение на граѓани на централна, интелектуална граѓанска асоцијација за развој „Клуб Цигар Скопје“.
„Клуб Цигар“ е регистрирано на улицата Будимпештанска 16б Карпош.
Како сопственици на здружението се наведени Зоран Мартиновски, шеф на канцелариите во Македонија и Црна гора на Меѓународна финансиска корпорација, адвокатот Љубчо Светиев, поранешниот министер за администрација и информатичко општество Иво Ивановски, Љубе Рајевски, претседавач на Македонска развојна фондација за претпријатија, бизнисменот Слободан Вукиќевиќ, Горан Анастасовски, генерален директор на КИБС, Ратко Трајковски, бизнисмен и основач на компанијата Интераптив Лабс , поранешниот директор на Агенцијата за храна и ветеринарство Дејан Рунтевски, Милан Ристевски, директор на клиника за радиологија и онкологија, Бошко Сибиновски, директор на фирмата СардичМК и Ацо Спасеновски, поранешен министер за земјоделство.
Претседател на здружението е Сибиновски, а основната цел на Здружението е унапредување на моралните и цивилизациски вредности на граѓанското општество, социјалниот, културниот и економскиот развој.
„Оваа цел здружението ја остварува со реализација на своите задачи за спроведување на истражувачки и аналитички проекти и активности, како и вршење на дејности и активности и организирање на настани од сферата на општествениот, економскиот, социјалниот, културниот и цивилниот живот на граѓаните. Остварувањето на целите и задачите на Здружението ќе придонесе за унапредување на економската, социјалната, културната, моралната, етичката и други сфери релевантни за севкупниот општествен и економски развој на Република Македонија, подобрување на бизнис, економска, едукативна, културна, научна и друга соработка помеѓу земјите од регионот и пошироко“, пишува во основачкиот документ.
Сибиновски во разговор со НОВА рече дека здружението е друштво на луѓе кои се почитувачи на убавиот начин на живот.
„Тоа е друштво на луѓе кои се почитувачи на убавиот начин на живот. Нема врска со ништо друго, освен со хедонизмот. Освен тоа ние ќе се залагаме и за интелектуален, општествен и културен развој“, рече Сибиновски.
Милан Ристевски, исто така еден од основачите на здружението вели дека „тие се здружуваат за да „пушиме пури и да пиеме коњак“.