Илија Гечев, сопственикот на компанијата ИГМ Трејд од Кавадарци пред судечкиот совет во Кривичниот суд во Скопје денеска во исказ во судскиот предмет „Плацеви на Водно“ откри дека поранешната власт му нудела да купи плац во текот на 2012 година. Понудата, како што објасни сопственикот на ИГМ Трејд, дошла од Миле Јанакиески, поранешен министер за транспорт и врски. По разговорот со Јанакиески, Гечев се сретнал со претставник од Министерството за транспорт и врски кој на средба во кафе барот „Тренд“ во центарот на Скопје му понудил плац на продажба од околу 1.000 квадрати по цена, како што рече сведокот од 1,3 до 1,5 милион евра.
Во вкрстеното испрашување на одбраната сведокот рече дека никогаш за овој плац не се сретнал со поранешниот премиер Груевски. Оваа бизнис зделка не се реализирала, но обвинителството сепак го повика денеска како сведок бизнисменот Гечев, најверојатно со интенција пред судот да покаже што повеќе детали за тоа кому и како биле нудени атрактивни парцели на Водно.
И сведокот Татјана Стојановска, сведочеше дека не се сретнала со Груевски кога била направена продажбата на становите. Таа во вкрстеното испрашување од одбраната на Груевски рече дека немала ни телефонски контакт со поранешниот премиер.
На прашање на адвокатот на Груевски дали се согласува дека само може да претпоставува дека становите ги користел Груевски, Стојановска одговори потврдно. Освен Стојановска на денешното рочиште сведочеше и сосетката на Груевски која на луѓе блиски до сега обвинетиот функционер продала стан од 57 квадратни метри.
Стојанка Митреска