Американскиот Стејт департмент, издаде соопштение доцна синоќа во кое на Република Северна Македонија и на уште 11 земји им беше упатена благодарност за прифаќање Авганистанци, во операцијата на САД за извлекување на луѓе кои изминатите 20 години работеле на демократизацијата на земјата.
Државниот секретар на САД, Ентони Блинкен изјави дека досега освен САД, уште 12 земји се согласиле привремено да прифатат Авганистанци, меѓу нив Северна Македонија, Албанија и Косово.
„Албанија, Канада, Колумбија, Костарика, Чиле, Косово, Северна Македонија, Мексико, Полска, Катар, Руанда и Уганда дадоа дарежливи понуди во врска со напорите за преместување на ранливите Авганистанци“, се вели во соопштението на Стејт департментот објавено доцна синоќа.
„Ние многу ја цениме поддршката што ја понудија и ние сме горди што работиме со нив за заедничка поддршка на авганистанскиот народ. Исто така, ние сме охрабрени што и други земји размислуваат да понудат поддршка“, изјави Блинкен.
Во соопштението се информира дека транзитот на евакуираните Авганистанци и државјани на други земји а кои го напуштиле Авганистан, се спроведува преку 14 земји и тоа: Бахреин, Данска, Франција, Германија, Италија, Казахстан, Кувајт, Катар, Таџикистан, Турција, Украина, Обединетите Арапски Емирати, Велика Британија и Узбекистан.
Блинкен рече дека од 14 август до сега, САД им овозможиле на околу 13.000 луѓе да го напуштат Кабул со американски авиони и дека ќе продолжат со спасувачката операција.
Говорејќи за глобалната акција, која ја оквалификува за „невидена досега за евакуација на американски државјани“ американскиот државен секретар Блинкен им се заблагодари на партнерите од целиот свет.
„Сакам особено да им се заблагодарам на нашите партнери низ планетата кои беа од клучно значење во оваа операција“, рече американскиот државен секретар.