Охриѓанецот Бобан Павловски го фати крстот што денеска напладне во реката Вардар од мостот Слобода го положи поглаварот на Македонската православна црква г.г. Стефан.
Павловски на сите им посака среќа и бериќет, а по повод фаќањето на крстот доби икона, златник и други подароци.
Поглаварот на МПЦ г.г. Стефан пред големиот број присутни граѓани рече дека верските празници треба да не потсетат дека треба да живееме според законите и заповедите на верата и да создаваме дела достојни за нашето човечко и христијанско постоење.
За учество на манифестацијата „Водици 2017“беа пријавени повеќе од 100 граѓани, а кум е сопственикот на ресторанот „Стара куќа“, Димитриј Јовановиќ.
На чинот на положувањето на крстот во реката Вардар во Скопје, присуствуваа премиерот Емил Димитриев и градоначалникот на Скопје, Коце Трајановски.
Православните верници денес го слават празникот Богојавление – Водици кој се поврзува со крштавањето на Исус Христос во водите на реката Јордан од страна на свети Јован, кој од тогаш се нарекува Крстител.
На денешен ден во водите низ земјава се фрлаат крстови, а оној што ќе го фати Светиот крст се верува дека ќе го следи благослов и среќа во текот на целата година.
Фаќањето на крстот значи соединување на човекот со Бога, а се верува дека со спуштањето на крстот водите се осветуваат и стануваат лековити.