Согласно законите, домашните фирми можат да отворат сметки во странство и да префрлаат пари кои мора да бидат оданочени и да им се знае потеклото. Ако преку аферата Документи од Панама се откријат имиња на Македонци кои спротивно на одредбите на Законот за девизно работење чувале пари таму, тогаш според Гувернерот на Народната банка на Република Македонија Димитар Богов, треба да се спроведе истрага без разлика дали се работи за политичар или за обичен граѓанин.
Тој вели дека Централната банка не може да обезбеди документи кои ќе докажат дали некој македонски државјанин има сметки во Панама за кои не се плаќа данок кон државата ако затоа не постојат меѓународни договори и спогодби.
– Ако Панама побара документи за нивни државјани, ние не можеме да им ги дадеме, постојат закони кои го регулираат тоа и не дозволуваат откривање на лични податоци и банкарска тајна. Тоа треба да се регулира со меѓународни спогодби за размена на такви податоци”, вели Богов.
Македонските граѓани ќе можат да отвораат сметки во странство тогаш кога Собранието ќе ги изгласа измените на Законот со што целосно ќе се либерализира девизното работење.
Богов открива дека Белизе, Сејшели, Лугано, Панама, Бермуда, Сент Винсент и Гренадини и други земји кои важат за даночни раеви често се наоѓаат во билансите на Народната банка од каде има приливи и одливи на пари од Македонија.
Според гувернерот се работи за легални трансакции кои се контролираат, а доколку се открие сомнителна трансакција, секоја банка има обврска, тоа да го пријави во управата за спречување перење пари.
Во досегашните контроли од Централната банка не се откриени неправилности или пак тие биле незначителни.