Бојан Јовановски денеска продолжи со поднесување на кривични пријави на записник во Основното јавно обвинителство Скопје, а поврзани со предметите „Рекет“ и „Меѓународен сојуз“. Неговиот адвокат, Сашо Дуковски посочи дека пријавите се однесуваат за најмалку 30 лица.
„Се поднесуваат кривични пријави против повеќе лица, најмалку 30. Поради сериозноста на наводите во кривичните пријави од страна на пријавителот, беше побарано непосредно вклучување на најрелевантните меѓународни институции за заштита на човековите права, особено на најрелевантните светски амбасади кои имаат свои дипломатско-конзуларни претставништва во Република Македонија заради содржината на тоа што се изјавува“, посочи Дуковски.
Тој наведе дека досега се поднесени седум-осум кривични пријави, истакнувајќи дека се пријавуваат лица за конкретни дејствија кои што се поврзани со овие два кривични настана. Делата, како што рече Дуковски, се поткрепени со писмени докази во голем обем и со вербални докази во кои се посочени лица кои непосредно биле присутни на тие дејствија.
Дуковски истакна дека се поднесуваат и кривични пријави за кршење на човековите права на Јовановски, за нехумано и нечовечко однесување, за лица кои не биле директно вклучени во постапката. Во однос на наводите дека му биле упатувани закани на Јовановски, минатиот пат кога даваше искази, Дуковски кажа дека поднел кривична пријава против непознат сторител за загрозување на сигурноста.
„Подготвен сум да соработувам со Обвинителството во секој момент за секоја понатамошна постапка што ќе го интересира Обвинителството во врска со тоа јавување“, рече Дуковски.
Адвокатот на Јовановски минатата недела изјави дека пријавите се однесуваат за функционери од државните институции, но и за лица надвор од нив. Притоа, посочи дека се за дела злоупотреба на службената положба и овластувања, изнуда, измама, давање лажен исказ, несовесно лекување, тортура, итн.
Јовановски во случајот „Рекет“ беше осуден на девет години затвор, а поранешната специјална обвинителка Катица Јанева доби седум години затвор.