Категорично тврдам дека ниту сум ја допрел торбата, ниту сум видел некакви парични средства. Јас видов затворена торба што Зоран Милевски ја зема со леснотија, изјави Бојан Јовановски-Боки 13 на денешното рочиште за случајот „Рекет“ во кој е првообвинет.
„Тврдат дека таму имало милион евра во апоени од 50 евра што е невозможно и ќе тежеше повеќе“, кажа Јовановски.
Најодговорно, рече Јовановски, тврдам дека немам ниту еден допир на таа торба и Обвинителството требаше да ја најде и да ја извештачи.
„Ноторна лага е дека мене ми биле дадени 500.000 евра за Јордан Камчев да излезе од притвор. Со Камчев не сум разговарал за никакво олеснување, туку сме разговарале само за бисниси. Сме оделе на вечери, сме збореле за сè и сешто. Ме провоцирале и прашувале да зборам и да се правам паметен и да зборам и за СЈО. Ме снимале и спакувале, но кажувам тоа биле само мои лични мислења“, изјави Јовановски.
Јовановски: Ниту знаев за „Империја“, ниту сум влијаел врз Јанева
Јовановски рече дека за постоењето на предметот „Империја“ дознал дента кога на неговата телевизија одекна веста за истрага на СЈО против Орце Камчев.
„Категорично тврдам оти не сум знаел дека ќе се отвори предмет „Империја“. Сега знам дека целта беше да се злоупотреби моето познанство за да се запре кривичниот прогон и од оваа дистанца знам дека тоа било целта на Зоран Милевски и запознавањето со Орце Камчев“, кажа Јовановски.
Нагласи дека за „Империја“ ниту знаел дека ќе се случи, ниту кога ќе се случи.
„Никогаш не сум направил нешто од тоа што беше побарано од мене од Милевски. Ниту сум можел да влијаам на Катица Јанева, ниту некој можел да и влијае. Тоа ќе можев да го докажам ако имаше вештачење на мојот телефон, да видите кој се ми има пишувано дека до Јанева никој не може да допре и дека е решена да оди до крај“, изјави Јовановски кој кажа дека со Катица Јанева се запознал во септември во 2018 кога ја барал да биде гостинка во емисија на неговата телевизија.
Конкретно за предметот „Империја“ рече дека се запознал со списите во текот на овој судски процес кога биле презентирани во судница.
Боки-13 ја обвини Русковска за корупција и директна поврзаност со случајот „Дијамед“
За разлика од тоа дека од Катица Јанева не добил никакви информации, рече дека Вилма Русковска често директно го брифирала за нејзините дејствија и за тоа кога и кој ден ќе повикува. Тој кажа дека имал средби со Русковска во неговата канцеларија со отворени разговори, кафе и алкохол. Неговите тврдења одеа дотаму што ја обвини и за корупција и директна поврзаност со случајот „Дијамед“ за кој рече е директен сведок.
Обвинителката Вилма Русковска, пак, реагираше до судот да го предупреди и порача дека ако некој поседува докази против неа или кој и да е, има институции каде да се пријави, а не на ваков начин да се плука.
Со првата емисија на „Инсајдер“, наведе Јовановски, почнале неговите проблеми и кампања од Зоран Азманов дека се работи за рекет побаран од него.
„Дека не се работи за рекет го имам документот од суд дека се отфрла пријавата“, изјави Јовановски.
За одземената гардероба рече дека најголемиот дел е купена или добиена пред 2018 година.
„Никогаш не сум бил повикан да потпишам што се е одземено од мојот дом“, рече Бојан Јовановски во сведочењето пред судот.
Судењето за предметот „Рекет”, почна на 3 декември во минатата година. На првото рочиште третообвинетиот Зоран Милевски-Кичеец ја прифати вината и беше осуден на три години затвор. Пред неколку недели нему, со гаранција, му беше укинат куќниот притвор поради семејни причини и одлуката по жалбата од Апелација ја чека од слобода.
Обвинителство за борба против организираниот криминал и корупција во случајот „Рекет“ ги товари Бојан Јовановски и Катица Јанева дека со умисла го рекетирале бизнисменот Јордан Камчев (обвинет во предметот „Империја”) за да му се укине мерката притвор во наведениот предмет.