Болницата „8 Септември“ денеска ги затвора одделенијата за Пулмологија со ендокринологија и Општа и ургентна хирургија. Директорот Сашо Стојчев ја потврди информацијата за НОВА и потенцира дека болницата ќе работи со намален капацитет со 75 кревети помалку. Причината за сето ова е недостигот на медицински сестри, поради што болницата полека колабира.
По десет кревети од одделението за пулмологија ќе бидат префрлени на гастроентерехепатологија, ендокринологија оди на кардиологија, а 10 кревети од општа и ургентна хирургија се префрлаат на дигестивна хирургија и на урологија.
„Подобро е да редуцираме 75 болнички кревети отколку цела болница. Веќе со месеци немаме никаква комуникација со Министерството за здравство, не одговараат на нашите барања да се реши проблемот со недостиг на медицински сестри. На овој начин не се развива јавното здравство, вака само му се помага на приватното здравство“, изјави за НОВА директорот Сашо Стојчев.
Од утре се затвораат и четири операциони сали, така што од седум болницата ќе работи со само три операциони сали. Стојчев најави дека сите ургентни оперции ќе бидат извршени, итните случаи нема да бидат враќани, но ќе бидат вратени сите закажани, односно операции кои можат да чекаат.
Неофицијално, министерот Тодоров барал од Градската хируршка болница„Св. Наум Охридски“, да и „позајми“ 20 медицински сестри на болницата „8 Септемрви“, но од таму добил негативен одговор бидејќи и тие кубурат со кадар.
Директорот Стојчев постојано укажува на проблемот со недостиг на медицински сестри,особено на тие во операционите сали. Болницата има 14 анестезиолози ,а само пет медицински сестри за работа во салите.
Минатата година според методологија на Министерството за здравство се констатира дека во болницата треба да се вработат 180 медицински сестри, не вклучувајќи ги физиотерапевтите и лаборантите. Конкурсот кој беше распишан пропадна бидејќи министерството не ги испрати тестовите за испрашување на кандидатите. Веднаш потоа пропадна и финансиската согласност.
Инаку, до денеска болницата од нова година до денес биле хоспитализирани 3940 пациенти. Болницата работеше со полн капацитет и ги прима пациентите од цела држава , не само од Скопје.