Пациенти кои се здобиле со скршеници од паѓање на снегот болниците ги враќаат дома бидејќи капацитетите с е преполни. Тие наместо во болница чекаат на ред за операција дома, а бројот на нови случаи секојдневно се зголемува. Кревет повеќе се бара на Клиниката за трауматологија и одделението во Градската хируршка болница каде хирурзите оперираат со полна пареа. Во градската општа болница„8 Септември“ со пациенти со скршеници почнале да го полнат и одделението за општа хирургија бидејќи на трауматологија веќе нема место.
„Преполно е, секој ден се примаат од три до пет нови случаи, а претходните не сме стигнале да ги оперираме. Веќе почнавме и на општа хирургија да ги префрламе. Некои од нив ги враќаме дома да чекаат додека да бидат повикани за операција. Многу итни случаи имаме, цело време оперираме пациенти со скршеници поради што негодуваат болните што чекаат на листата и по една година за операција“, изјави за НОВА Сашо Стојчев директор на болницата „8 Септември“.
Тој нагласи дека се во комуникација и соработуваат со Клиниката за трауматологија и Градската хируршка болница, но ситуацијата била слична и таму. Болниците се преполни со луѓе кои паднале и се здобиле со повреди на снегот поради неисчистените улици.
Според Стојчев работата дополнително е отежната бидејќи немаат доволно медицински сестри за во операционите сали.
„На 45 хирурзи и 40 анестезиолози имаме само седум инструментарки, односно медицински сестри за работа во операциона сала.“, рече Стојчев.
Ваквата ситуација следува откако пропадна обидот да се вработат нови 60 медицински сестри, поради што болницата работи во многу отежнати услови, а медицинските сестри дежураат секој трет ден.
Хирурзи од скопските клиники пак револтирано коментираат дека Фондот за здравство подобро е да се обиде да го плати чистењето на улиците од снегот отколку да ги плаќа трошоците за операции на толку голем број на пациенти со скршени колкови, раце или нозе.