Угледот на ЕУ на меѓународната сцена зависи од истрагата за случајот со корупција наречена од медиумите „Катаргејт“, изјави шефот на дипломатијата на ЕУ, Жозеп Борел на Форумот за човекови права, нагласувајќи дека корупцискиот скандал во кој е вмешан Европскиот парламент доведе до тоа „луѓето да се смеат на ЕУ”.
Минатата недела, властите во Белгија, дом на Европскиот парламент, извршија неколку апсења и претреси во Брисел како дел од истрагата за сомневања за корупција поврзана со Катар. Конкретно, приведена е потпретседателката на Европскиот парламент, грчката политичарка Ева Каили и нејзиниот партнер, а претресена е и нејзината резиденција. Како дел од истрагата, белгиската полиција запленила над 1,5 милиони евра во готовина и вредни подароци. Кајли беше исклучена од својата политичка партија ПАСОК во Грција и го загуби местото во Европскиот парламент.
„Тоа што се случи во Европскиот парламент… не треба да го криеме, напротив треба да покажеме колку е сериозно, колку е сериозно за нашиот политички систем. Некои ни се смеат и велат: „Хаха, зборувајте за корупцијата во мојата земја, но погледнете што се случува во вашата земја! Но, тука барем обелоденуваме и реагираме, има одговорност. Тоа е голема разлика. Но, мораме да бидеме многу внимателни… Нашиот надворешен авторитет зависи од тоа како ќе се справиме со оваа ситуација“, рече Борел, говорејќи на форумот за човекови права во Брисел.