Поранешниот британски премиер Борис Џонсон кој деновиве ја изгуби и пратеничката функција поради скандалот со забавите за време на пандемијата, ќе се врати на своите новинарски корени и ќе пишува неделна колумна за десничарскиот и најтиражен британски весник Дејли Меил.
Веста прв ја прошири американско-европскиот политички портал Политико кој се повика на три одделни извори кои му рекле дека гласините дека британски Дејли меил ангажирал нов колумнист кој е голем ерудит се однесуваат на Џонсон. Подоцна веста беше потврдена и од Дејли меил со дополнителна информација дека објавувањето на колумните почнува од утре и дека тие ќе бидат „задолжително четиво во Вестминстер“.
Според изворите на Политико хонорарот на Џонсон ќе биде шестцифрен.
Пишувањето колумни ќе му даде на Џонсон кој неделава беше предмет на остар извештај на парламентарниот комитет, платформа да го критикува својот горчлив ривал, премиерот Риши Сунак.
Колумната во „Мејл“ ќе биде првиот редовен новинарски ангажман на Џонсон откако тој се откажа од функцијата во „Дејли Телеграф“ во 2019 година. Сепак, уредниците на „Мејл“ како што се наведува не се пресреќни од веста за нивната нова колумнистичка ѕвезда.
Еден поранешен уредник на Џонсон, кој одби да зборува со име и презиме искоментира: „Тој пишува многу уникатно, чисто, елоквентно и живописно. Но друго прашање е дали колумните ги предава навреме и дали нивната содржина е тоа што претходно сме го договориле“.
Истиот уредник рекол дека и покрај високиот хонорар што им се дава на такви ѕвезди и натаму останува опасноста како медиумот да се заштити од колумнистот да не ги дава најдобрите вести на ривалски медиум.
„Тоа беше најголемата фрустрација на сите“, додава тој. „Едноставно беше тешко Џонсон да се менаџира“.
Во видеото на Дејли Мејл во кое го промовираат ангажманот, Џонсон рече дека колумната – почнувајќи од сабота – „ќе биде токму она што јас мислам“.
„Можеби дури и ќе треба да покривам политика – но очигледно ќе се обидам да го правам тоа што е можно помалку, освен ако апсолутно не морам“, рече тој.
извор: Политко
подготви: С.К.