Доколку Асен Василев и Кирил Петков учествуваат во новиот владин кабинет, ние ќе понудиме наши видни личности, како Дељан Добрев, Томислав Дончев…., изјави лидерот на коалицијата „ГЕРБ-СДС“ и поранешен бугарски премиер, Бојко Борисов, по неколкуте дена преговори со второпласираната коалиција на последните парламентарни избори “„ПП-ДБ“, што се чинеа за плодни, затоа што е усогласена законодавната програма, а во моментов се преговара и за владината програма и личностите кои ќе бидат застапени во неа.
На овој начин, Борисов одговори на новинарско прашање дали Василев и Петков се прифатливи за ГЕРБ-СДС во евентуалниот владин кабинет, за што веќе има шпекулации по медиумите.
„Мислам дека коалицијата „Промените продолжуваат – Демократска Бугарија“ гледа дека никој не е подобро подготвен од мене да биде премиер, но јас се повлеков за да дадам шанса за влада“, коментира Борисов.
Затоа, смета тој, и Петков и Василев треба да го сторат истото, за да има можност за програмски, експертски кабинет, кој врз основа на одговорност ќе раководи во следните четири години.
„Ако имаме буџет и програма, мислам дека ако ги расчистиме емоциите, ќе се договориме и за поединците“, истакна лидерот на ГЕРБ.