Бугарскиот премиер Бојко Борисов изјави дека не и дозволил на шефицата на бугарската дипломатија Екатерина Захариева остро да реагира на изјавата на нејзиниот српски колега Ивица Дачиќ , бидејќи, како што истакна, „знае колку прашањето за Косово е болно за Србите“.
Борисов ова го изјави вчера на конгресот на владечката партија Герб во Софија, пренесоа бугарските медиуми.
Борисов оцени дека доколку Белград и Приштина не се договорат, нема да има натамошна перспектива за регионот.
Тој објаснува дека Бугарија „ќе им помогне на своите браќа Срби“ и конкретно, како пример, наведе дека следната година ќе се заврши изградбата на автопатот за Белград.
Српскиот министер за надворешни работи, Ивица Дачиќ, во Познањ на самитот за Западен Балкан му порача на бугарскиот премиер Бојко Борисов да го почитува ставот на ЕУ за независноста на Косово и да не му „држи лекции” на новоизбраниот шеф на европската дипломатија, Жозеп Борел.
Дачиќ реагираше на изјавата на Борисов дека шпанскиот дипломат треба да ги застапува интересите на ЕУ за независноста на Косово, а не и на неговата земја, која не го признава Косово.
-Бојко, има да го почитуваш ставот на ЕУ, а не да му држиш лекции на Борел. На што тоа ти личи, тоа е безобразно. Најмногу ме нервира лицемерието, доста ми е повеќе од тоа. Да не кажувам дека тој доби наш орден, рече Дачиќ.
Во текот на викендот амбасадорите на земјите беа истовремено повикани во министерствата за надворешни работи во Софија и во белград.




