Ексминистерот за внатрешни работи, Љубе Бошкоски, по денешното рочиште за предметот „Тортура“, изјави дека верува дека конечно во Македонија ќе се врати, како што рече, изгубената правна држава.

-Верувам во судот. Верувам дека за сите оние кои беа неправедно обвинети, неправедно осудени ќе се бвноват постапките и вистината конечно ќе победи, изјави Бошкоски.

Тој рече дека сега ситуацијата е променета.

-Моите прогонители сега се прогонувани од обвинителството, за кривични дела за кои сум сигурен дека ги сториле. Сепак ситуацијата е многу тешка, многу емотивна, бидејќи се враќаат спомените за времето на заробената држава, тортурата што се вршеше врз сите оние кои поинаку мислеа, , рече лидерот на „Обединети за Македонија“.

Бошкоски денеска во детали го опишуваше моментот на апсењето, навредите што му биле упатувани и бруталноста со која било постапувано.

Бошкоски во судницата ги препозна обвинетите ,,алфи” Ивица Анчевски- Пуки и Новица Станковски.

„Слушнав ‘апси го‘, бев во шок и закочен во место, ја фрлив кесата и видов лица со фантомки, како и немаскирани лица. Ми ги раширија рацете и почнаа да ме претресуваат, некој извика ‘легнете го ѓубрето на земја, п**** му материна‘, во еден момент , со некој за мене непознат зафат, ме легнаа на земја, ме газеа со колена, а еден од нив извади пиштол, ме притисна со него за образ, а траг од тоа носев на лицето со денови и во притворот во Шутка, раскажуваше Бошкоски.

Однесувањето на лицата кои го апселе, Бошкоски, освен изживување, го окарактеризира како натпревар кој повеќе ќе се покаже пред шефот. Тортурата, рече Бошкоски пред судот, службените лица ја завршиле кревајќи го Бошкоски од земја, врзан со лисици, залепувајќи го до полско ВЦ до „Воденица“. Од тука бил однесен во Автокоманда, а според неговото сведочење, и во возилото повеќе пати му било нагласено дека го поздравил шефот, како и за тоа дека го чекаат неколку години затвор.

Од полициската станица во Автокоманда Бошкоски бил однесен во Истражниот затвор во Шутка, а спроводот го реализирале други полицајци кои, според Бошкоски, биле коректни.

Чинот на неговото апсење Бошкоски го нарече политички реваншизам и кумулирана несфатлива омраза која, како што рече, произлегувала од неговите политички говори, а како мотив за апсењето го наведе фактот што по 19 години ја напуштил ВМРО-ДПМНЕ и ја формирал партијата Обединети за Македонија.

Бошкоски му поставуваше и прашања на адвокатот на Сашо Мијалков, Љупчо Шврговски, кој во тоа време беше државен јавен обвинител.

– А дали вие ја знаевте наредбата за апсење додека бевте јавен обвинител, праша Бошковски како реплика на прашањето дали знае каква е постапката за апсење за криминал.

Бошковски побара да не го прашуваат глупости.

Бошкоски рече дека видеото од неговото апсење се’ уште го има поставено на каналот ,,Јутјуб”.

Судењето продолжува в петок, 7 септември, со доказна постапка и изведување на материјалните докази.