Судот во Велес ги ослободи од обвинение Ордан и Љупчо Георѓиевски кои беа обвинети дека извршиле нарачано убиство на 72 – годишниот старец од велешко Ореше. По речиси една деценија низ судските лавиринти заврши сагата на двајцата браќа.
Основниот суд во Велес во февруари 2015 година ги осуди тројцата обвинети: 13 години затвор за Ѓоре Петровски, кој беше обвинет дека го нарачал убиството на старецот Лазо Милошевски во 2005 година и по 10 години за браќата Љупчо и Ордан Ѓорѓиевски.
Судот го прифати обвинението дека Петровски го нарачал и платил убиството на Лазо Милошевски, со кого бил скаран години наназад, а Љупчо и Ордан го убиле старецот во неговата куќа во Ореше.
Адвокатот Ѕвонко Давидовиќ тогаш рече дека било очекувано да добијат осудителна пресуда, гледајќи што се случувало во овој предмет од кој произлезе и предметот „Ликвидација“ кој е веќе правосилен. Адвокатот најави жалба и на оваа пресуда.
Во случајот, заштитениот сведок „Бреза“ ја промени изјавата и тврдеше дека лажел под полициска принуда. Во меѓувреме, Златко Арсовски ваквата изјава ја потврди и на ова судење, а обвинителството против него поведе постапка и е осуден за давање лажен исказ.
За случајот зад решетки завршија судии, обвинители, адвокати во случајот Ликвидација. Жртва во случајот беше и новинарот Томислав Кежаровски кој одлежа неколку месеци во притвор обвинет дека го открил името на заштитениот сведок.