Под мотото „Пушти ја светлината“, вечерва во Битола со проекција на најновиот македонски игран филм „Соба со пијано“ на Игор Иванов-Изи започна 34. издание на Интернационалниот фестивал на филмската камера „Браќа Манаки“.
На црвениот тепих пред Домот на културата во Битола продефилираа авторите и актерите од новиот домашен филм „Соба со пијано“, гостите и учесниците на фестивалот, кој ќе трае до 20 септември. Последните два фестивалски дена гостинка на фестивалот ќе биде водечката француска и европска актерка Изабел Ипер, добитничка на две кански „Златни палми“.
„Животот е убавина, но ние стоевме цврсто на земјата за да го подготвиме годинашното издание на фестивалот“, рече директорката Лабина Митевска и додаде дека мотото на фестивалот ја слави светлината бидејќи без неа не можеме да живееме.
Таа ги најави членовите на жирито во официјалната натпреварувачка програма, предводено од шпанскиот кинематографер Хосе Луис Алкаин, годинашен добитник на „Златната камера 300“ за животно дело, и жирито на програмата „Нови визии“, предводено од македонскиот режисер Антонио Митриќески.
Претседателот на македонската асоцијација на филмски професионалци, Горјан Тозија, ја додели нововоспоставената награда за животно дело на режисерот Кирил Ценевски, истакнувајќи дека со ова се исправа една децениска неправда нанесена на авторот на култниот македонски филм „Црно семе“.
Претседателот Иванов му ја додели наградата за животно дело „Златна камера 300“ на кинематограферскиот маестро Алкаин, човекот зад камерата во филмовите на Педро Алмодовар, Брајан де Палма и десетици други врвни европски и светски автори.
– Нека биде светлина – посочи Алкаин, примајќи ја наградата.
Годинешното издание ќе понуди 74 филмски наслови од светската и од македонската кинематографија. Меѓу нив има четири премиери, потоа два кандидата за „Оскар“, голем број наградувани филмови на светските фестивали, познати автори и филмски таленти.
Првпат за публиката ќе бидат прикажани и „Барајќи ја среќата“ на Марија Џиџева за ергените од Битолско кои бараат невести во Албанија и „Слатки“ на еден од најинтригантните израелски режисери, Јосеф Пичадѕе.