Владата на Ковачевски ќе им излезе во пресрет на бранителите кои бараат да се укине присилната наплата од страна на извршителите на обештетувањето што им беше исплатено поради трауми претрпени за време на воениот конфликт во 2001 година.
Бранителите и по 20 години од војната освен со лузните од воениот конфликт, се борат и со извршители, откако Врховниот суд пред неколку години ја поништи првостепената судска одлука за исплата на нематеријална штета на припадниците на безбедносните сили .
На прашање на Нова дали и кога бранителите може да очекуваат позитивно решавање на иницијативата на здружението „Достоинство“ од Министерството за одбрана (МО) доаѓаат вести на оптимизам:
-Владата, Министерството за одбрана, Министерството за внатрешни работи и Министерството за финансии, преземаат мерки да се реши проблемот во интерес на барателите. Имајќи предвид дека се работи за сложен правен случај побарано е стручно мислење од правни експерти за начините за надминување на проблемот. Веднаш штом ќе дојдеме до конкретно решение јавноста ќе биде известена, велат од МО.
Бранителите велат дека не бараат преку леб погача, ниту привилегии во однос на другите граѓани, ни милостина од државата. Тие без око да им трепне во 2001 година застанаа на браникот на татковината и велат дека ќе ја преживеат и оваа битка, но за да на крајот победи правдата ѝ порачуваат на Владата да и стави крај на оваа голгота што им го зема мирот сега.
Стојанче Ангелов, лидерот на Достоинство, кој со години заедно со другите бранители води неуморна битка за исправање на неправдите, досега има поднесено неколку иницијативи. Првата, како што ни објасни, ја поднел додека бил државен советник во МВР, втората и третата како национален координатор за воени и полициски ветерани во Владата и последната во јули 2021 како претседател на „Достоинство“.
И покрај поддршката, како што вели, што ја добил претходно од поранешниот премиер Зоран Заев и министрите Оливер Спасовски и Радмила Шекеринска, иницијативите не ги поминаа владините лавиринти.
Бранителот Димче Манчев, неодамна за Нова ТВ изјави дека овој проблем може многу лесно да се реши, ако Владата донесе акт со кој ќе се откаже од овие побарувања во буџетот и да побара Министерството за одбрана да ја укине присилната наплата преку извршител.
– На сите ни беше јасно дека одлуката на Врховниот суд беше политичка во тоа време. Јас како учесник во војната во селото Ваксинце имам добиено паричен надомест за нематеријална штета. Не бев повреден, но поради претрпен страв и трауми ми беше доделен надомест во вредност со судските пресуди од околу 420.000 денари. После десет години, откако ни беа исплатени парите, односно два месеца пред истекот на рокот за застарување на делото, кога немавме време ни за жалби, ни за ништо друго, ми беше побарано да ги вратам парите. Преку извршителот треба да вратам 14.000 евра, се присетува бранителот Манчев кој сега работи во македонската гранична полиција.
И останатите бранители го поздравуваат тоа што Владата на Ковачевски има политичка волја да се зафати со решавање на овој долгогодишен проблем.
Ангелов бара поддршка и за уште една иницијатива со која треба да се надмине друга голема неправда кон 17 семејства на загинати бранители како и кон триесетина воени инвалиди од 2001-та, кои се уште немаат добиено праведен надоместок на нематеријална штета.
Стојанка Митреска