Историски чин за нашата црква е одлуката што Вселенската патријаршија ја призна МПЦ-ОА и воспостави канонско единство, бидејки Македонската Православна Црква е примена како црква во семејството на православни цркви, вели за Нова ТВ Бранко Ѓорѓевски, верскиот аналитичар и новинар.
„Нејзиниот статус и име се уште не се уредени, но ова значи дека нашата црква веќе не е шизматичка, не е расколничка како што тоа и го наметна Српската православна црква од 1967 година кога сме ја прогласиле црковната автокефалност. Нашите црковни достоинственици сега ќе можат да сослужуваат со достоинствениците од другите православни цркви како рамноправни. Но одлуката за тоа ќе ја сноси секоја православна црква самостојно. Од оваа одлука произлегува дека вселенската патријаршија ќе почне со такви сослужувања за нас, да одржува литургија. Сега останува да се види како ќе се однесува СПЦ на која Вселенската патријаршија би и препорачала да ги уреди управните прашања кои ги има со нас“, вели верскиот аналитичар.
Како што дополнува Ѓорѓевски ова значи дека практично значи СПЦ е повикана со нас да разговара околу статусот во иднина.
„Јас не очекувам дека СПЦ ќе се согласи да ја прифати одлуката на вселенската патријаршија и дека во иднина ќе преговара со нас за нашиот автокефален статус, но тоа тогаш ќе значи дека на сцена повторно ке стапи Вселенската патријаршија која од таква ситуација, како што беше случај со украинската православна црква ќе може да донесе и конечна одлука со која ќе бидеме прогласени за автокефална православна црква“, дополнува тој.
Според него интересно ќе биде и каква ќе биде реакцијата на Бугарската Православна Црква со оглед на тоа што Вселенската патријаршија денеска не призна како Охридска Архиепископија а токму таа сметаше дека она е наследничката.
Маја Терзиова