Цвета Пешовска, невработена мајка на три деца е осудена на три месеци затвор поради неплатена сума за алиментација за нејзините две деца чиј старател е поранешниот сопруг. Оваа 32 годишна жена за НОВА тврди дека и покрај тоа што уплатила 44 000 денари и уплатницата ја приложила кон жалбата, судот одлучил Пешевска да оди во затвор. Решението стигнало денеска.
Цвета долго време не била вработена така што се насобрала сума од 75 000 денари од кои 31 000 денари успеала да плати. За останатите 44 000 денари помогнаа да се соберат жените и самохраните мајки од Фејсбук групата на Една може.
„Се шокирав кога утринава ми стигна решение од Граѓанскиот суд дека жалбата ми е одбиена и дека треба да лежам три месеци во затвор. Не знам како можеле да донесат таква пресуда кога уплатницата од која се гледа дека парите се уплатени беше приложена со жалбата. Не успеав да го дочитам образложението до крај, ми се стемни пред очите“, раскажува за НОВА, Пешевска.
Оваа млада жена е бремена и веста многу ја вознемирила. Таа раскажа дека откако се развела со поранешниот сопруг во 2011 година, имала проблеми бидејќи цела година не и дозволувал да ги види децата. Сега вели дека ги гледа само во сабота од 10 до 19 часот, синот кој има 14 и ќерката 10 години. Цвета во меѓувреме повторно се омажила и од вториот брак има едно дете, второто е на пат.
„Никогаш не сум се согласила децата да бидат кај него иако во документот од Центарот за социјална работа напишале така. Не знам како можеа да го направат тоа“, рече Пешовска.
Цвета нема право на повторна жалба и не знае која ќе биде разврската од судкиот процес. Таа се надева дека судиите ќе ја коригираат одлуката бидејќи, смета дека е направена груба грешка.