Комисијата за заштита од заразни болести денеска донела заклучоци и предложила две мерки до министерот за здравство, Беким Сали.
– Укинување на задолжителното поседување негативен ПЦР тест или потврда за прележаност или вакцинација при излез од земјата е првата предлог-мерка, а втората е укинување на ослободувањето од работа за бремените жени согласно препораките на релевантните институции, изјави денеска на прес конференција портпаролот на Комисијата за заразни болести, д-р Злате Мехмедовиќ.
Тој ја појасни првата предлог мерка за укинување на задолжителното поседување негативен ПЦР тест или потврда за прележаност или вакцинација при излез од земјата.
– Тоа не значи дека во земјите каде што ќе биде потребно да поседувате ПЦР тест или сертификат дека сте вакцинирани или дека сте прележале ковид-19 дека таму нема да ви се бара, туку напротив – при излез од земјава, се укинува мерката којашто беше донесена минатата година дека треба да ги поседувате и да ги покажете на нашата граница, рече д-р Мехмедовиќ.
Оваа мерка беше воведена на 31 август минатата година.
Тој до бремените жени упати препорака да се вакцинираат против ковид-19 и појасни дека мерката да бидат ослободени од работа се укинува по препораките од релевантни институции.
– Во светот препораките се дека може да се вакцинираат и дека вакцинацијата за бремените жени е безбедна и е препорачлива, и не само за нивното здравје и со работниот процес, туку и, генерално, со движењето низ популацијата. Доколку бремените жени сакаат навистина да го заштитат своето здравје и здравјето на своите деца тогаш најлогичното објаснување е дека треба да бидат вакцинирани, додаде д-р Мехмедовиќ.
(Љ.Б.)