Милиони бебешки лежалки на производителот „Фишер Прајс“ се повлечени од пазарот по смртта на неколку десетици бебиња, пренесуваат светските агенции кои се повикуваат на извештајот на американската комисија за безбедност на потрошувачи (ЦПСЦ).
„Смрт кај бебиња се случувала во лежалките „Rock ‘n Play“, откако бебињата ќе се завртеле на страна или на стомак додека не биле под надзор или во други околности“, се наведува во дел од изјавата на ЦПСЦ пришто се потенцира дека од малопродажба ќе бидат повлечени 4,7 милиони производи.
Комисијата утврди дека во тие лежалки починале најмалку 32 бебиња од 2009 година. Се огласи и „Фишер Прајс“ од каде порачаа дека доброволно ги повлекуваат сите производи во партнерство со ЦПСЦ.
„Црвсто остануваме на ставот дека нашите производи се безбедни. Но, сепак, со оглед на пријавените инциденти во кои лежалките се користеле во спротивност на сигурносните предупредувања и упатства, одлучивме дека доброволно повлекување е најдобар начин за делување“, соопштија од компанијата.
Американската педијатриска Академија во текот на неделата повика на повлекување на производите од пазарот. Нејзиниот претседател, Кајл Јасида ги нарече бебешките лежалки „смртоносни“ и рече дека е неопходна итна акција.