Триесет и деветте мртви луѓе пронајдени во камионот во областа Есекс биле кинески државјани, дознава Би Би Си.
Полицијата продолжува да го испрашува возачот на камионот Мо Робинсон (25), кој беше уапсен под сомнение за убиство.

Полицијата во Северна Ирска извршила рации во две куќи, а Националната агенција за криминал соопшти дека работи на идентификување на „групите на организиран криминал кои можеби имале удел во оваа дело“.
Според информациите, приколката ладилник во Пурфлит на реката Темза пристигнала од Белгија. Таа потоа била подигната од камион од Северна Ирска.
Вчера во камионот беа откриени телата на 38 возрасни и еден тинејџер.
Белгиското јавно обвинителство отвори истрага, изјави портпаролот Ерик Ван Дајз.
– Се претпоставува дека контејнерот преминал преку Белгија и е качен на брод во Зебруг, рече тој, додавајќи дека не е познато колку долго бил во Белгија.
Според британските медиуми, возач на камионот е Мо Робсинсон, жител на северниот ирски град Портадаун.
– Камионот е пронајден во индустриската област Ватерглајд, а потоа е преместен, рече заменик началникот на полицијата Пипа Милс, објаснувајќи дека е приоритет да се идентификуваат жртвите.
Засега не е познато кога жртвите биле сместени во контејнерот или дали тоа се случило во Белгија. Британската полиција најави дека процесот на идентификација што е во тек, најверојатно ќе потрае подолго.
Премиерот на Бугарија, Бојко Борисов потврди дека камионот бил регистриран во Бугарија во 2017 година, но оттогаш не влегол во земјата. Тој ја отфрли можноста дека пронајдените сега починати лица се качиле во камионот во Бугарија, но рече дека соработуваат со британските власти.
Илјадници мигранти се шверцуваат во Велика Британија секоја година со камиони, бродови, а понекогаш и со авиони. Такви случаи се пријавуваат речиси секој ден.
Амнести Интернешнл и други групи за човекови права оценуваат дека острата политика на британските власти за илегална миграција ги тера мигрантите кон се поочајни чекори за влез во земјата.




