Close Menu

Британска амбасада за Нова ТВ: Националната химна се свири само кога почесната гарда пречекува шефови на држави

0
By on ВЕСТИ, ПОЛИТИКА

Националната химна се свири само кога почесната гарда пречекува шефови на држави, велат од Британската амбасада за Нова ТВ, а во врска со реакциите на социјалните мрежи по првата официјална посета на министерката за одбрана Славјанка Петровска на Обединетото Кралство, кога во чест на македонската делегација на церемонијата за пречек британскиот воен оркестар ја свиреше македонската народна песна „Јовано, Јованке“.

 Британскиот протокол, како што објаснуваат од Амбасадата, при официјални посети на високи гости на Обединетото кралство, предвидува воениот оркестар на свечената церемонија вообичаено да свири песна од поднебјето од каде што доаѓаат гостите, а не државната химна, освен ако не станува збор за официјална посета на шеф на држава.

Видеото каде е снимен овој свечен чин предизвика реакции на социјалните мрежи во кои освен пофални зборови за честа што британскиот воен оркестар и ја укажа на делегацијата на С. Македонија имаше и бројни забелешки и прашања зошто не била интонирана македонската државна химна, иако тоа не го предвидува ниту британскиот протокол.

Нова ТВ побара одговор од Британската амбасада на прашањето што предвидува британскиот протокол за посетата на високи гости од други држави, во случајов министер за одбрана и дали во ваков случај треба да се интонира и државната химна на матичната држава на високите гости, односно како постапува протоколот во ситуации како што е македонскиот случај што според нашите информации е вообичаена пракса?

– Вчера, министерката Петровска беше пречекана со Почесна гарда составена од Колдстримската гарда кога пристигна на средбата со министерот за одбрана на Обединетото Кралство. Како што е вообичаено за ваквиот вид на гарда, на почетокот беше отсвирен музичкиот сегмент „Скорпиус“. Во знак на почит, пред министерката да ги поздрави гардистите, беше отсвирен и сегмент од македонска народна музика, „Јовано, Јованке“. Нациналната химна се свири само кога почесната гарда пречекува шефови на држави, велат од Амбасадата на Обединетото Кралство за Нова ТВ.

Наспроти неоснованите реакции на социјалните мрежи поттикнати од непознавање на британскиот протокол министерката Петровска на социјалната мрежа на Фејсбук се заблагодари за укажаната почит:

„Огромна чест е кога на церемонијата за пречек, британскиот воен оркестар ја изведува нашата „Јовано, Јованке”. Благодарам за честа до мојот британски колега, Бен Валас. Сојузниците се посилни заедно“, порача Петровска која во Лондон се сретна со британскиот државен секретар за одбрана Бен Валас. 

Македонската министерка и британскиот државен секретар остро ја осудија инвазијата врз Украина и испратија порака на обединетост на сојузниците и подготвеност за гаранции на безбедноста на државите – членки на НАТО Алијансата.

Стојанка Митреска

Share.