Престижното британско и едно од водечките светски музички списанија „Грамофон“ во својот јунски број го издвои како компакт-диск на месецот новиот албум „Варијации“ на македонскиот пијанист Симон Трпчески.

Трпчески за своето најново соло издание, а трето за издавачката куќа „Лин рекордс“ избра дела од Моцарт, Бетовен и Брамс.

Рецензентот на „Грамофон“ за новото издание истакнува дека во исто време „Варијации“ предизвикува восхит и зачуденост. Во поширокиот осврт се истакнува дека интерпретацијата на Трпчески на оваа „деликатна, нежна музика е најличното свирење што го слушнал од него“.

„Длабоко тапациран, секако, но во исто време јасен, жесток и искрен. Целата варијација (од Моцарт – н. заб.) е како виор низ прозорецот на возилото кое забрзано се движи по автопатот со безмалку 130 километри на час. Изведбата на Трпчески може да послужи како саундтрак за научно-фантастичен филм на Андреј Тарковски“, одушевено подвлекува критичарот на највлијателното светско списание за класични рецензии „Грамофон“.

Максимални пет ѕвездички – и за изведба и за квалитет на снимката, на албумот „Варијации“ му додели и престижниот британски „Би-Би-Си мјузик магазин“, чиј рецензент Мајкл Чрч ја истакнува „карактеристичната префинетост на Трпчески“, подвлекувајќи ги убавината и лесниот допир кои изведбата „во исто време ја прават интимна и земјотресна“.