Српската премиерка Ана Брнабиќ ги отфрли наводите дека иницијативата „ Отворен Балкан“ е во криза и порача дека сите оние кои ќе и се приклучат во наредната година ќе имаат значајна корист , а дека оние кои нема да се приклучат ќе зажалат, пренесе Танјуг.
– Секако дека не е во криза. Таква иницијатива не може да биде во криза. И да останат Србија и Албанија или само Србија и Северна Македонија , таа и понатаму е победничка иницијатива, изјавила Брнабиќ во емисијата „ Хит Твит“ на ТВ Пинк.
Премиерката нагласила дека оваа иницијатива носи огромна корист за граѓаните, стопанството, политичката стабилност, па со самото тоа и за иднината на регионот.
– Кој и да учествува во иницијативата „ Отворен Балкан“ во овој момент, тоа се Србија, Северна Македонија и Албанија , сигурна сум дека во наредната година ќе имаат таква корист што не само што ќе се приклучат и другите , или од некој балкански инает не сакаат, но, ако не се приклучат горко ќе зажалат, изјавила Брнабиќ.
Станува збор за толку добра , фокусирана и свртена кон иднината иницијатива така што не постои начин таа да пропадне, рекла Брнабиќ.
Брнабиќ нагласила дека на состаноците во рамките на „ Отворен Балкан“ се разговарало и за тоа дека од некои инвестиции кои ги привлекува денеска Србија, која е поуспешна од сите земји во регионот заедно, соседите имаат корист.
-Тогаш цел синџир ќе биде во регионот и повторно сите ќе имаме корист. Очекувам во наредните недели и месеци да имаме јасни резултати а веќе и ги имаме . Вучиќ целосно ја промени парадигмата за односите во регионот“ порача премиерката Брнабиќ.