Претседателот на Здружението за Македонско-бугарско пријателство Добре Митрев вели дека главната порака што сака да ја испрати откако пописот покажа дека во Македонија живеат 3.504 Бугари е дека тие треба да влезат во Уставот независно од бројката. На тој начин Македонија, вели Митрев, ќе покаже дека не им се прекршуваат правата на граѓаните кои можат слободно и без притисоци да се самоопределуваат, што не било случај, како што вели, на пописот затоа што добивал поплаки од граѓани кои се жалеле дека попишувачите им барале преку лична карта да ја докажат својата националност и не им дозволувале да видат што запишале во своите таблети, откако биле попишани.
-Бројките не се важни, важно е да се почитува правото на самоопределување. Не е важно дали во Македонија има 1.000, 5.000 или 10.000 Бугари, туку е важно тие да влезат во Уставот како и сите други кои живеат на територијата на државата, вели Митрев во изјава на Нова.
Тој е роден во Македонија и вели дека во своите 58 години досега немал никакви притисоци, но дека тоа не може да го каже за други жители кои имаат бугарско државјанство, живеат во Македонија, а се чувствуваат како Бугари.
Тој изрази сомнеж во податоците на Заводот за статистика и тврди дека се манипулира со иста бројка која била прикажана како гласови за политичката партија ГДУ на Петар Колев која на последните парламентарните избори освоила 3.555 гласа, а на пописот беа изброени 3.504 граѓани кои се самоопределилe како македонски Бугари.
– Како е можно Бугарите да бележат прираст,а бројката да стои иста со години. Колку гласачи, толку Бугари. Тоа не е можно, каде се тука запишани децата. Некој треба да објасни како може да има прираст на македонските Бугари, а да нема измени во бројката на граѓаните кои се изјасниле како Бугари и гласале на избори, со сегашната од 3.504, изјави Митрев.
Претходно, лидерот на бугарската партија „Има таков народ“, Слави Трифонов реагираше на резултатите од пописот што ги објави Државниот завод за статистика. Според него, со тоа што само 3. 504 граѓани се изјасниле како Бугари, е како воопшто да нема Бугари, а само во последните две години бугарски пасоши добиле 16.692 граѓани на Северна Македонија.
И Митрев е убеден дека во земјава има повеќе Бугари, отколку што се попишани и се повикува на бројките од над 100.000 издадени пасоши за македонски државјани.
– Според Законот, бугарско државјанство може да се добие само ако тие што барале ги докажале своите бугарски корени во Бугарија, така што таа бројка од над 100.000 граѓани кои се изјасниле како Бугари не е случајна, смета Митрев.
С.М.