Српската полиција распореди голем број припадници во Белград во обид да се зачува мирот поради најавениот протест на студентите во блокада и од попладнево кога почнаа да се собираат голем број граѓани кои ја поддржуваат властите.
Во центарот на српскиот главен град засега се е мирно, јави дописникот на МИА од Белград.
Во близина на парламентот се распоредени голем број полициски комбиња како и пред зградата на РТС што е во близина.
На плоштадот Славија каде треба да се одржи големиот протест на студентите во блокада веќе има голем број граѓани, дел од нив се од собири на граѓани од голем број белградски општини.
Затворен за сообраќај е Бранков мост како и мостот Газела, додека полицијата затвори сообраќај и на неколку улици во центарот на Белград.
Поддржувачите на студентите кои се противат на блокадата на факултетите, на повик на владини претставници, го исполнија платото и улицата пред Парламентот на Србија, како и блискиот плоштад Никола Пашиќ каде што треба да се одржи книжевната вечер. Граѓани, предводени од некои лидери на СНС, пристигнуваат од различни делови на градот.
Српскиот патријарх Порфирије повика на единство, нагласувајќи од Видовданската литургија во манастирот Раваница да бидат отворени во однос едни кон други, да ги слушаат другите, да бидат подготвени да ги поднесат слабостите едни на други и да не инсистираат одвреме-навреме да биде онака како што сакаат.