Најмладиот пациент што деновиве му беше дијагностициран рак е девојка на 22-годишна возраст, а најголемиот дел од пациентите се на возраст од 60 до 70 години. Во претходните три години и во услови на пандемија на нашата клиника нема листи на чекање ниту за хемотерапија, ниту за радиотерапија. Ниту еден пациент не е вратен, сите се прегледани и навреме ја примаат терапијата, изјави денеска вели д-р Нино Васев, директор на Универзитетската клиника за радиотерапија и онкологија на денешната промоција на новиот линеарен акцелератор од типот Varian, марка „Halcyon”.
Акцелераторот веќе е во функција, а д-р Васев, заедно со министерот и заменик-министерот за здравство, Беким Сали и Владимир Рендевски, денеска го посетија бункерот кадешто апаратот е сместен.
– На нашата клиника се лекуваат најтешко болните пациенти, а, за среќа, околу 80 отсто од нив се на возраст од над 60 години, додека од средната и помладата генерација има помалку пациенти. Зголемувањето на малигните болести од 3,6 отсто на европско ниво, се однесува и за нашата земја. Прецизноста на зрачењето со овој апарат драстично ќе се зголеми, бидејќи машината работи двојно побрзо, рече д-р Васев.
– Акцелераторот е пуштен во клиничка употреба и со него се воведува нова техника на радиотерапија – волуметриска модулирана лачна терапија (ВМАТ), при што се опфаќа туморот и ризичниот простор околу него. Тоа што ја прави оваа техника подобра од другите е брзината на испорака на дозата пропишана од радиотерапевтот, а секако и таргетирањето е подобро. Оваа техника првпат се изведува и претставува синхронизирање со останатите радиотераписки центри во регионот и Европа, посочи Сали.
Анцелераторот е со вредност од 108 милиони денари и е обезбеден од Министерството за здравство преку јавна набавка, а со средства од Клиниката за онкологија е обезбедена адаптација на просторот, каде е сместен линеарниот ацелератор, изградба на бункер, ходници и друга апаратура.
Одговарајќи на новинарски прашања, тој рече дека во јуни планираат да го промовираат и да го пуштат во употреба вториот акцелератор во ГОБ „8 Септември”.
Д-р Васев рече се залагаат машините во Градската општа болница „8 Септември” најитно што може да профункционираат.
– За тоа нѝ треба и кадар, не е само машина туку треба шест обучени техничари, двојца физичари, веќе едниот специјализира, имаме докторка што ќе работи таму и уште еден доктор ќе ни треба таму за да може тој центар да функционира, додаде д-р Васев.