Буџетот е во добра кондиција. Приливот на средствата во првите четири месеци од годинава е соодветен на очекувањата, а плаќањата се вршат навремено, изјави вицепремиерот и министер за финансии, Зоран Ставрески, на денешната прес-конференција, одговарајќи на новинарски прашања.
– Имаме прелиминарни податоци за април и како што очекувавме април е завршен со мал суфицит што ќе помогне да се изврши нивелација на зголемените расходи што беа во февруари, на почетокот на годината и во март поврзани со исплаќањето на обврските кон стопанството и субвенциите. Така, дефицитот е во рамки на очекувањата за првите четири месеци и таков ќе биде до крајот на годината. Очекуваме да се исполнат проекциите, изјави министерот Ставрески.
Тој потенцира дека нема заостанати обврски и оти сите фирми навреме добиваат поврат на ДДВ и навреме се исплаќаат сите фактури.
Сепак, официјалните податоци на Министерството за финансии за првите три месеци покажуваат дека буџетскиот дефицит во првите три месеци изнесуваше 185,7 милиони евра, што е за два и пол пати повеќе од ланските 73,6 милиони евра за истиот период. За цела година, пак, износот на буџетскиот дефицит е предвиден на нивото од 287,7 милиони евра и од оваа сума Владата веќе потроши 64,5 отсто од овие пари само во првите три месеци од годинава.