Во Бугарија, се отворени гласачките места на парламентарните избори на кои социјалистите, кои се сметаат поблиски до Русија, се обидуваат да спречат повторно освојување на власта на кандидатот на партијата ГЕРБ, Бојко Борисов, кој веќе беше два мандати премиер на оваа земја, пренесува АФП.
Агенцијата соопшти дека се очекува ГЕРБ, која е за ЕУ, и Бугарската социјалистичка партија, предводена од нов лидер, енергичната Корнелија Нинова, да освојат околу 30 отсто од гласовите.
Медиумите наведуваат дека избирачките места беа отворени утрово во седум часот по локално време, а првите резултати се очекуваат набрзо по завршувањето на гласањето вечер во 20 часот. Право на глас имаат околу 6,8 милиони луѓе.
Ројтерс ги пренесе резултатите од најновите анкети според кои ГЕРБ, на поранешниот премиер Борисов е во блага предност во однос нс БПС, чија популарност е во пораст, откако кандидатот кој таа партија го поддржа, Румен Радев, победи на претседателските избори во ноември. ГЕРБ има поддршка од 31,7 отсто од гласачите, додека во чекор ја следат социјалистите со поддршка од 29,1 проценти од гласачите.
Борисов поднесе оставка по победата на Радев, поради што се одржуваат третите парламентарни избори во Бугарија во рок од само четири години. Ако ја задржи власта, се очекува дека ГЕРБ и натаму ќе ги намалува јавните трошоци, за разлика од социјалистите кои ветија зголемување на платите и пензиите и на јавните расходи.
Но, најверојатно ниедна партија нема да освои доволно гласови за да може сама да владее, па извесно е дека ќе биде неопходна поддршка од Обединетите патриоти, коалиција од три националистички партии кои, според анкетите, се на трето место по популарноста, и тоа благодарејќи на распространетиот гнев поради прилив на мигранти.
Иако Бугарија историски има силни врски со Москва, партијата ГЕРБ на Борисов, е проевропски ориентирана и ги поддржа санкциите на ЕУ против Русија поради нејзината улога во украинската криза.
Од друга страна, социјалистите на чело со 47-та Корнелија Нинова ветија дека ќе гласаат за натамошни санкции, што претставува уште една потенцијална главоболка за ЕУ во момент кога се соочува со излез на Британија од Унијата и продор на десничарските популисти.
Аналитичарите потсетуваат дека и по 10 години откако стана членка на ЕУ, Бугарија и натаму е најсиромашна членка на Унијата, со распространета корупција. Оваа земја останува популарно место за Русите, а освен тоа зависи и од руското снабдување со енергија, додека многу Бугари чувствуваат силна културна поврзаност со Русите со кои ја делат кирилицата и православната вера.
Бугарија го превзема шестмесечното претседавање со ЕУ во јануари 2018 година.