„Актуелната политичка криза е многу слична на начинот на кој беше соборена владата на Филип Димитров во 1992 година. Интересно е што и тогаш причината беше Македонија и тоа се случи во време кога Бугарија можеше да се повлече. Тогаш имавме шанса да бидеме со Полска, Чешка и Унгарија, а не да бидеме во редот меѓу поранешните источни земји“, вели поранешниот пратеник и политички аналитичар во колумна за бугарската новинска агенција, БГНЕС, Едвин Сугарев.
Тој смета дека, сепак има разлика во политичката ситуација во деведесеттите и сега, а таа најмногу се однесувала на сериозноста на геополитичкиот момент.
„Ова што се случува денеска ќе има многу сериозни последици за Бугарија. Ако се погледне што се случува на социјалните мрежи и како расте бројот на тролови кои агитираат со про-путин реквизити, ќе сфати дека се работи за активен настан чија крајна цел е промена на геополитичката ориентација на Бугарија. Во нашите граници се води војна и таа може да расте. Крајната цел на Путин не е Украина. Една од неговите цели е да ја преземе контролата врз Црното Море и за него стратешки би бил многу важен пробивот во Бугарија“ , вели екс бугарскиот пратеник Сугарев.
Во колумната, Сугарев смета дека на власт требало да остане владејачката коалиција и да направела се да ги обезбеди бугарските национални интереси. Според него, се друго би значело изумирање на реформите пред се во правосудството, а би пропаднал и Планот за закрепнување и развој од кој Бугарија очекува огромна сума европски пари, смета Сугарев.
„Реакциите на политичките сили покажуваат дека никој не сака да владее во овој момент и не сака предвремени избори, со исклучок на „Преродба“. Другата опција за која се разговара е формирање експертска влада. Ова не враќа кај Филип Димитров. По неговата влада дојде онаа на проф. Љубен Беров, а тоа беше де факто владата на „Мултигруп“ и мафијата. Ова би било многу лоша судбина за Бугарите, заклучува Сугарев во колумната за БГНЕС.