На последниот состанок на Мешовитата бугарско-македонска комисија за историски прашања не е постигнат опиплив напредок во решавањето на прашањата. Ова за БГНЕС го изјавил членот на комисијата професор Кирил Топалов, јави пред малку бугарската новинска агенција.
Топалов тврдел дека учесниците од македонска страна во Комисијата најголем дел од времето разговараале за записниците од минатите средби. „Затоа и јас и моите колеги изразивме став дека е апсурдно да се разговара за минатогодишниот записник. Препорачавме во блиска иднина после секој состанок записникот да се усвои во разумен рок и дури потоа да се оди на нов состанок“, рекол Топалов.
Според него, историчарите на Северна Македонија, како што нагласил, ја покажуваат својата позната непопустливост и намерно доцнење во решавањето на важните прашања, бидејќи очекуваат официјална Софија за еден месец да го укине ветото и да почне преговори за членство во Европската унија.
„Мојот впечаток е дека се цврсто убедени дека ќе бидат ослободени. И ова се уште е далеку од сигурно дека ќе се случи, барем засега нема такви индиции, дури и да преовладува спротивното“, изјавил Топалов.
„На почетокот на нашата заедничка работа имавме големи надежи дека нашите колеги ќе бидат поконструктивни, бидејќи впечатокот ни беше дека добро ги знаат историските факти и ќе бидат пообјективни. За жал, се чини дека ги консолидираат своите позиции, кои се далеку од историската вистина и се чини дека сè повеќе не сакаат да решат никакво прашање. Жално е кога гледате дека научниците се спремни да кажат црно-бело доколку се диктирани од политичките позиции на властодршците“, вели тој.
Тој, како што вели известувачот на бугарската новинска агенција, ги коментираше и неодамнешните иницијативи на „истакнати личности од бугарската преродба“, како Јоаким Карчовски, Кирил Пејчиновиќ и други, да се претстават како „Македонци“.
„Ги прашав колегите од Република Северна Македонија дали има случај некој од овие „македонски преродбеници“ да го употреби зборот „македонски“ или „Македонија“ наместо „бугарска“. Нема таков случај. Секогаш го користат зборот „бугарин“, а идентитетот не се гради на лаги, многу брзо пропаѓа“, коментирал Топалов.