Чешкиот премиер Петр Фиала вети компензација за сите граѓани, преку станбен додаток, чии сметки надминуваат 30 отсто од нивните приходи, а во Прага штом надминат 35 проценти од приходите.

„Владата нема да дозволи кој било да пропадне. Граѓаните за домување ќе плаќаат максимално 30 отсто од нивните приходи, во Прага 35 проценти и тоа вклучувајќи ги сите плаќања за енергија. За сите трошоци над 30 отсто од приходите, државата е подготвена да плати“, истакна Фиала, јави телевизијата ЧТ.

Станбениот додаток во Чешка не е новост. Досега беше вид на социјална помош за најсиромашните семејства. Фијала сега апелираше до граѓаните да не се срамат да го бараат и оние кои до зголемените трошоци за енергија годинава, немале право на додатокот, пренесе Бета.

Во првата половина од оваа година, државата преку станбен додаток исплати околу 208 милиони евра. Кон крајот на август ќе бидат познати и деталите за посебна поевтина тарифа за струја и гас за домаќинства, во чии рамки државата со 2,5 милијарди евра ќе ги субвенционира трошоците за идната грејна сезона на граѓаните за скапата енергија.

Министерството за индустрија и трговија почнува со проверка на авансните плаќања што енергетските компании им ги испраќаат на потрошувачите, затоа што се множат информациите за злоупотреба на поскапувањето, потрошувачи плаќаат аванси повисоки од крајните трошоци.