Со објавувањето дека ќе се бори за четври мандат, германската канцеларка Ангела Меркел можеби е пред најголемиот тест во кариерата – да го одбрани европскиот и трансатлантскиот „статус кво“ во светло на несигурноста и на едниот и на другиот блок, оценува агенцијата Ројтерс.
Меркел во неделата соопшти дека е подготвена повторно да се кандидира.
Меркел (62) која е канцелар веќе 11 години сега има задача да ја „закотви“ западната алијанса разнишана со победата на Доналд Трамп на претседателските избори во САД и да ја врзе поцврсто ЕУ на која и се заканува распад, констатира британската агенција во анализата.
– Со заминувањето на претседателот Обама, Меркел за Западот останува единствената и последната надеж на либералната демократија, пишва Ројтерс, констатирајќи дека тоа можеби е преголем товар за неа.
– Ако избере да продолжи, ќе понесе голем товар. Би сакал да бидам таму и да олеснам на некој начин, но таа е силна, изјави американскиот претседател во заминување Барак Обама за време на недамнешната посета на Берлин.
За да успее на меѓународната сцена во четвртиот мандат, Меркел прво мора да ги „изглади“ односите на поделба поради својата политика на „отворени врати“ кон бегалците, смета Ројтерс.
Во случај повторно да биде избрана, што и се очекува, Меркел ќе има голема одговоност – од разговори со претставниците на Велика Британија за излез од ЕУ, преку смирување на тензиите во Турција и унапредување на односите со новоизбраниот американски претседател Доналд Трамп.
Најголем предизвик веројатно ќе биде интеграцијата на бегалците од Блискиот исток во поделеното општество и зачувување на Европа како моќна економија.
Првпат за канцеларка Меркел е избрана во 2005 година, а доколку победи на изборите следната година и остане на оваа функција цел мандат, таа ќе се изедначи со нејзиниот ментор Хелмут Кол, кој на местото канцелар помина 16 години.
Точниот датум на изборите во Германија се уште не е утврден, но се претпоставува дека ќе бидат одржани меѓу 23 август и 22 октомври следната година.
Кој ќе и биде противкандат?
Германската Социјалдемократска партија (СДП) изложена е на притисок да одлучи кој ќе биде кандидатот што ќе и се спротивстави на Меркел.
Партијата на левиот центар имаше канцелар до 2005 година, кога изгуби од Меркел, а по изборите во 2013 влезе во коалициска влада со партијата на Меркел ЦДУ.
Лидерот на СДП Зигмар Габриел, потпретседател на Владата и министер за економија, се уште не одлучил кого ќе го кандидира за канцелар. Како можен и многу сериозен кандидат, се смета и претседателот на Европскиот парламент Мартин Шулц.
Шулц помогнал СДП на изборите за Европскиот парламент да оствари еден од најголемите успеси претходните години, но малку е познат дома во Германија.
Потпретседателот на СДП Ралф Штегнер изјави дека Габриел ќе предложи кандидат навреме, но дека партијата нема да дозволи да биде под притисок.
– Ќе донесеме исправна одлука со која ќе имаме добри шанси да ја понедиме Унијата, изјави Штегнер неодамна.
Според истражувањето на јавното мислење, Социјалдемократите заостануваат зад партијата на Меркел за 10 проценти, а нивниот успех би можел да зависи од левичарскиот сојуз со партиите на Зелените и Левицата.
Коалицијата на левичарските партии, дури и ако победи на изборите, не е лесно остварлива, бидејќи Левицата настана со противењето на економските реформи кои ги спроведуваше токму владата под водство на СДП.