Лични карти и возачки дозволи во неопходни ситуации од понеделник ќе може да се доставуваат на домашна адреси на граѓаните, најави министерот за внатрешни работи Наќе Чулев на денешната прес-конференција. Воедно нагласи дека ова нема да важи за пасошите бидејќи при нивно подигање е потребно е да се остави отпечаток од прст.
„В понеделник ќе го смениме правилникот при што во оние ситуации кога тоа е неопходно ќе се остави можност личните документи, односно личните карти и возачките дозволи, да може да се доставуваат од страна на полициски службеници на домашните адреси. За патните исправи не постои техничка можност бидејќи мора да се земе повторно отпечаток од прст, рече Чулев.
Првиот човек на МВР додаде дека се дадени конкретни упатства до Одделот за управни работи како да се однесуваат во ситуација со коронавирусот односно да се почитува соодветното растојание кога граѓаните поднесуваат барања за документи. Дадени се и конкретни насоки за дезинфекција на уредите каде на граѓаните им се зема отпечаток од прст.
Чулев информира и дека на ниво на Влада се разговара и за можноста во следниот период да им се дозволи на сопствениците на миленици кои живеат во колективните станбени објекти да ги изнесуваат милениците на одредено растојание од објектите.