Во рамките на европскиот филмски фестивал Cinedays, вечерва во 20 часот во киното Милениум ќе се прикажува филмот „Дипан“ на францускиот режисер Жак Одиар кој годинава ја освои „Златната Палма“ на Канскиот филмски фестивал.
Екслузивни гости се и главните глумци Jesuthasan Antonythasan и Kalieaswari Srinivasan. Овој филм, меѓу другото, зборува за проблемите на мигрантите во Франција.
Проекцијата на филмот ќе биде бесплатна, во чест на загинатите жртви од теророт во Париз, одлучи директорот на фестивалот.
Во 22 часот ќе се прикажува „Мојата мајка“ на Нани Морети. Филмот веќе освои неколку награди меѓу кои и од Екуменското жири на Канскиот филмски фестивал.
Ова е приказна за Маргерита, режисерка која снима филм со познатиот американски актер, Бери Хагинс и кој ѝ создава многу главоболки за време на снимањето.
Во киното Фросина во 19 часот е закажана проекција на филмот „Светот е мој“ во режија на Николае Константин Танасе.
Овој романски филм е дел од официјална селекција и е приказна за шеснаесетгодишната Лариса која живее во еден мал приморски град.
Програмата продолжува во 21 часот со „Симшар“ на Ребека Кремона. Филмот на Ребека Кремона е во конкуренција за награда на „Синедејс“ како дел од официјална селекција.
Се работи за приказна за малиот Тео кој заминува на риболов со татко му и дедо му, рибари од Малта, но работите фаќаат лош правец кога нивниот брод „Симшар“ ќе потоне, а тие ќе останат заробени среде Медитеранот…
Во џебното кино во 20 во рамките на музичките документарци, ќе се прикажува „Секс и пренос“ на Тим К. Смит, американска приказна за животот, за слободата и за едно независно радио.
Оваа приказна за радиото WFMU од Њу Џерси длабински ја разоткрива најуникатната станица во светот и обидот на Кен Фридман да ја одржи во живот наспроти постојаната опасност од нејзино затворање.
Во истото џебно кино во 22 часот ќе се прикажува „Смртта“ на Бернардо Бертолучи.
Филмот на Бертолучи е во рамките на ревијата филмови посветени на Пазолини. Во близина на реката Тибер, во еден римски парк, убиена е проститутка. Полицијата трага по луѓето што биле во паркот таа вечер. Ги испрашува и тие мораат да објаснат зошто биле таму. Еден од нив е убиецот.